以前都無諗過，原來女團都會搞拳賽？更加無諗過，小編原來有一日會入場睇拳賽？Lolly Talk 嘅暗黑星團企劃日前（8月27日）就搞咗場由MeiMei（曾美欣）同Ahyo （郭曉妍）嘅「打MeiYo」擂台對戰！
佢哋早於半年前就開始接受特訓，由零開始學，到呢一日終於埋身激戰！賽事由程人富同埋阿J做主持，仲請嚟專業嘅評判同埋現場旁述，氣氛超級好之餘亦都好緊張！
現場嘅一班波板糖粉絲們，入場前都作出艱難嘅抉擇，要喺MeiMei同Ahyo之間作出選擇，小編就係 #TeamMeiMei =，見證住呢場充滿熱血同埋汗水嘅賽事！
平時好少做運動嘅MeiMei，為咗今次嘅賽事操得好落力，而忙內Ahyo都展示好堅嘅腹肌，睇嚟都好有實力咁！
喺大戰開始之前，#TeamMeiMei 同 #TeamYO 同現場觀眾大玩遊戲，當中有幸運嘅波板糖們可以享受到被成員出拳打嘅滋味，真係好幸福！
一眾妹豬仲準備咗四面台版嘅Dance Battle《8 sec》同《一把火》，簡直係將成晚帶入高潮！
賽事就分三節，每節兩分鐘，你或者諗住做騷嘅姐？完全唔係，互出拳腳，真係打㗎！去到第二節，MeiMei仲主動進攻狂得分，打到第三節，Ahyo又搶返主動，雙方不留力咁出拳較量，最後MeiMei以點數獲勝，拎到金腰帶！
賽後LT全員都相擁，包括Ahyo喊到收唔到聲！「我覺得呢半年真係改變咗好多，心態成熟咗好多，無以前咁軟弱」
MeiMei除咗打到腳軟之外，仲親身感受到運動員嘅辛苦：「今次感受到運動員嘅辛苦，不過我哋係十分一都冇嘅辛苦，好想多謝每位運動員」
最令人印象深刻嘅，一定係Sinnie呢句： 「冇嘢係唔可能，有望大家可以多啲相信自己，相信多啲你決定要行嘅路」
最後全場大合唱《數到十》，歌詞同現場嘅畫面都好夾，見過MeiMei嘅「快轉身躍起」、「若然未數到十 仍能被你 一秒扭轉」，呢首歌又有一份新嘅意義啦！
呢一份嘅熱血、勇於嘗試，或者就解釋到點解Lolly Talk咁得人鐘意！現場嘅Merch都真係好靚，入場仲有贊助商送嘅 ULOS沖涼液添！多謝咁多位支持LT嘅金主爸爸！
／／小編自肥時間＼＼
今次活動地點去到西沙真係有啲遠，仲要遲咗收工趕入去不過見到咁多位妹豬嘅創意、誠意，真係超級感動！尤其係成晚嘅氣氛，打氣beat、rundown，都真係世界級～真係從來都無諗過會有女團搞拳賽，仲要咁精彩！ 我係波板糖真係好自豪！Proud of Lolly Talk！
當晚片段請去我哋嘅YouTube Channel/ IG睇啦!
0 個留言