【香港｜灣仔美食】616牛肉火鍋專門店 牛總午市一人火鍋 打邊爐原來一個人都可以盡興？

記得以前冬天先會打邊爐，貪佢暖笠笠 不過時移勢易，今時今日就算夏天都有得打！打邊爐亦都由一班人先食得開心，發展到今日即使一個人都可以盡興！一直以靚料高質牛肉作招牌嘅「616火鍋專門店」，依家午市就仲有限定嘅一人火鍋套餐添！

湯底同埋肉類都可以四揀一，包括「理想點鮮」牛骨湯底、沙嗲、鮮牛油麻辣同埋青花椒辣湯。肉類有唔同部位揀，包括安格斯橫隔肌、澳洲五花趾、牛駝峰同埋滑尾龍，都係一啲平時少見嘅部位！

再配埋基本嘅配料，牛丸、貢丸、帆立貝、蛋餃，蜂巢豆腐同埋娃娃菜、金菇，都唔錯！

一人火鍋

今次小編就揀咗鮮牛油麻辣湯底，肉就揀咗安格斯橫隔肌。用gas爐上嘅湯底，紅噹噹有幾隻辣椒，睇落都幾辣，配料同埋肉用另外個兜裝住，賣相好似日式小火鍋咁！

試吓個湯頭，真心幾辣吓，辣度有譚仔中辣嘅程度，好濃好有油香，難怪店員都確認食係食得辣先落單！

安格斯橫隔肌油脂都幾均勻，肉質都幾嫩 4-5塊薄切，份量唔算多，不過都對得起價錢。貢丸同埋牛丸都係正常貨式，講真呢個價都唔預會有手打，收貨㗎啦！

蛋餃就幾出色，薄得嚟煮耐啲都唔爛，係個帆立貝講真就有少少令人失望嘅，原因唔係唔新鮮，而係太細粒，尤其個湯底火紅火熱真心好難搵。

烏冬都係用上急凍嘅讚岐烏冬，煙韌好食無投訴！醬料自助，任加唔嬲 跟餐有埋嘢飲，杯菊花桂園露潤返 唔使食到個咀辣哂，正！

▌ 616牛肉火鍋專門店

地址：銅鑼灣謝斐道391-407號新時代中心地下C舖
營業時間：
（星期一至四）中午12點至晚上10點30分
（星期五六、日及公眾假期）中午12點至晚上11點30分
官方網站：按此