【香港｜銅鑼灣美食💛】渣甸坊隱世拉麵小店過江龍「拉麵凪」 濃厚背脂豚骨湯底 可能係全香港最好食拉麵？

未有假去旅行，又好掛住日本拉麵嘅味道？ 香港都有唔少高質嘅拉麵店，而呢間絕對係小編嘅pocket list之一！ 講緊嘅就係呢間連店面都唔識讀嘅「拉麵凪」啦！ 

隻字望落就知道係日文漢字，讀音係「なぎ」(nagi) ，如果強行用廣東話讀，應該都係讀「止」嘅！ 雖然間舖喺銅鑼灣，但係要搵佢一啲都唔易－因為佢就喺渣甸坊排檔果條街，行過完全都唔起眼，真係夠哂隱世！ 

叫得拉麵店，主打嘅當然係幾款唔同口味嘅拉麵，湯底標榜無添加防腐劑、用上西班牙豬骨熬製10小時。包括招牌嘅「豚骨」、香辣嘅「赤骨」、墨魚汁做base嘅「黑骨」、同埋滿滿意國風情、加埋海量芝士嘅「綠骨」拉麵。聽講佢哋嘅自家製餃子都好吸引添！ 

一坐低已經好有日本嘅感覺，因為店員都會好畀心機咁向你介紹佢哋每一款拉麵，個介紹真係做到鉅細無遺，好有熟悉嘅日本感覺，真心抵讚！

綠骨拉麵

綠骨拉麵

今次就揀咗最特別嘅一款－「綠骨拉麵」！ 個湯底係用上羅勒同埋橄欖油調製而成，加埋店家熬製嘅豬骨湯，同埋海量嘅芝士粉，就生成呢碗綠骨拉麵！

湯頭有一層背脂，飲落好重豬骨味，濃郁得嚟又唔重口味，入口都唔會好滯！加埋羅勒同埋橄欖油，特別甘香。採用幼身嘅拉麵，好掛湯，但真係唔可以打卡太耐，因為吸湯能力太勁，好易浸到腍哂。

叉燒就有三款，唔係肥果種，食落都幾滑，要溏心蛋嘅話要自己另外加15蚊，有少貴！

凪日式豚餃

餃子真係做得好出色，皮薄餡多唔再講，煎得香脆咬開又有香濃肉汁，上面再加埋店家自製嘅蘿蔔醋，食落唔膩又有新鮮感，值得一試！ 

雖然食碗拉麵都要過百蚊埋單有少少肉痛 不過計落高質好味又好服務，真係值回票價！ 唔知你又試過未呢？不妨同我哋分享吓！

▌拉麵凪（拉麵なぎ）

📍地址：銅鑼灣渣甸坊48號采怡閣地下5號舖
⏰營業時間：早上11時30分至晚上8時
官方網站：https://www.instagram.com/ramennagihk/