通常賣某個國家菜式嘅餐廳，都會有返果個國家嘅特色裝修。不過你又有冇諗過，賣台灣菜竟然會行土耳其風？講緊就係呢間喺中環蘇豪區嘅「旅窩」啦！
【揀飲．簡食記全新會員系統 BEST CLUB，立即加入獲取更多獨家優惠 !】
喺正PMQ對面，兩層青綠色嘅舖面，喺舊樓群之中都幾搶眼。店名叫做「旅窩」，當然唔係要補天啦。（誤 上網睇返介紹，店名原來係「喜歡旅遊的你和我一起窩在這裡」嘅意思。正因為咁，一入到舖頭入面，就見到店家海量嘅旅遊收藏品！
間舖嘅樓上要訂位先上到，上面係濃濃嘅土耳其風，聽講幾有特色，去過嘅不妨喺留言區同我哋分享吓！樓下就係簡約木系裝修，walkin都坐得。除咗對住坐嘅座位之外，亦都有向住街外嘅單人位，望住PMQ個view食嘢都幾好㗎！
間舖主打台式料理，標榜全部嘅便當都唔加味精。午餐有招牌嘅「豆乳鹽酥雞」、「蕃茄紅酒牛肋肉」同埋限量嘅「醬油大雞腿」揀。 每個便當都跟飯同埋每日嘅三小，加埋嘢飲都係飲嘢正價再減十蚊，仲可以加配揀唔同嘅小食。
豆乳鹽酥雞便當 (配特製大澳蝦醬)
識揀一定揀呢個招牌菜！每份鹽酥雞都有5件，份量超大呀！
咬落脆卜卜，炸漿唔厚之餘，食落一啲都唔油，最最最重要係入面件雞肉仲keep得住好嫩滑添！咬落帶少少咸香，係惹味嘅感覺！
點埋個大澳蝦醬，無諗過竟然唔係變得好咸，反而兩者嘅咸味有唔同層次，好似鮮味仲昇華咗！ 9
個飯入面仲有野菜、粉絲同埋涼拌雲耳，多料到舖滿哂成碗飯面，每啖飯都可以伴住食！絕對唔使驚飯乾！ 如果唔想食飯都可以揀米粉等，總有一款啱心水！
酥炸花枝丸
個花枝丸炸得幾好，外皮香脆，三粒20蚊都算係咁啦！ 如果想食小食，都仲有台灣腸、抹茶蕨餅同埋另一招牌名物「牛角窩夫」等等。
以前去親蘇豪，通常都係食貴嘢，唔幾百蚊落樓都唔得，不過依家附近都有唔少幾高質又親民嘅選擇 呢個又係唔係你心目中嘅選擇呢？ 不妨留言同大家分享吓！
【揀飲．簡食記全新會員系統 BEST CLUB，立即加入獲取更多獨家優惠 !】
▌旅窩
📍地址：中環蘇豪鴨巴甸街42號地舖
⏰營業時間：早上11時30分至下午4時，晚上6時至9時45分（星期日休息）
Instagram: 42_carpediem
0 個留言