【銅鑼灣美食💛】希雲街Peek-A-Chill 開揚泰菜超高質 黃金地段親民價錢 78蚊起有交易 CHILL爆足料好味道！

銅鑼灣希雲街一帶，一路都好多好嘢食，呢間喺街頭、新開嘅「Peek-A-Chill」，你又試過未呢？

【揀飲．簡食記全新會員系統 BEST CLUB，立即加入獲取更多獨家優惠 !】

聽呢個店名，就即使醒起同一條街、主打夏威夷魚生飯嘅「PEEK-A-POKE」。原來呢間「Peek-A-Chill」就係佢哋嘅姊妹店，不過就走完全唔同嘅風格－裝修好開揚，木系嘅裝修加埋好多植物，營造出幾warm嘅感覺！

連啲窗都好似去咗外國咁樣，全部都係向上推開，有吧檯亦都有普通嘅座位。小編就鐘意佢哋窗邊嘅高檯上面，可以邊食邊睇住出面繁忙嘅街景，都咪話唔chill～

午餐時間嚟到，SET BRUNCH 78蚊起就有交易，喺銅鑼灣黃金地段嚟講，都尚算親民！選擇都幾多，好似豬頸肉、船麵、pad thai、水門雞飯，就連蟹肉炒飯、泰式炒河都可以食到！跟餐加8蚊就有嘢飲、亦都可以加配唔同小食，好似辣魚餅、串燒、醃魷魚筒，連醃東風螺都有，真係好癲！

落單就自己QR code落搞掂，唔使下下等店員～

香葉肉碎煎蛋飯

每次去親新嘅泰菜餐廳，小編都係試佢嘅香葉肉碎飯。除咗係因為個人鐘意食之外，最重要係試到店家嘅誠意，因為呢個飯雖然係好易整，但係要整得好食，同埋足唔足料，就好易見到店家嘅質素同埋誠意！

呢間嘢嘅出品就真係幾合乎要求啦！免治肉碎唔會太肥或者太柴，用上四季豆、辣椒仔加埋九層塔葉炒成，食落有油香辣辣哋真係超級惹味！連隻煎蛋都做到燶邊香脆，蛋黃剛剛熟！個擺盤又靚，成個package真係好加分！ 再加埋啲脆炸豬皮食，煙韌又脆口，真係好爽！

餐飲－青檸梳打

用泰象嘅梳打水，自己倒入去金屬杯度，由於真係由雪櫃拎出嚟，真係好L凍，尤其天氣涼少少，真係透心涼出嚟！

今次小編就只係試咗個lunch 估唔到個quality會係咁好～
你又有冇試過喺度食夜晚呢？ 不妨同小編分享吓你嘅食後感！

【揀飲．簡食記全新會員系統 BEST CLUB，立即加入獲取更多獨家優惠 !】