平時小編諗唔到食咩嘅話，餃子都係一個常設之選！好食嘅餃子最緊要就係皮薄餡靚夠足料，不過有湯餃、蒸餃、煎餃、炸餃，你又鐘意食邊款？小編就嚟到位於太子嘅呢間「甜記餃子」，相信係餃子控嘅你對呢個名應該唔感到陌生…
由長沙灣起家，開到旺角同埋太子都有分店。太子呢間分店仲更加顛覆咗餃子舖既有嘅形象添！ 講緊嘅就係佢嘅裝修－唔同一般餃子店通常都係茶仔細檯、白色瓷磚咁款，太子分店用上工業風嘅水泥牆、木檯木櫈，即刻成個感覺文青咗好多！
除咗招牌嘅餃子之外，呢間分店仲有啤酒供應，餃子啤一啤，果然夠哂特別！不過近排唔少人話佢哋退步咗唔少，係真唔係呢？
湯餃 （粟米芝士雞肉餃／白菜豬肉餃）
湯餃可以揀配雞湯或者蕃茄薯仔湯，今次小編就揀咗清清啖啖嘅雞湯。飲落清甜唔錯！兩款餃餃皮都算薄，薄得嚟又唔會一夾就爆。
個餡好足料，成隻睇落都漲卜卜咁，食落「白菜豬肉餃」入面啲豬肉都仲好juicy，菜肉比例都剛剛好，都算幾清新唔肥膩！
「粟米芝士餃」個芝士都幾香，咬落都仲有拉絲效果。入面嘅雞肉打到免治咁款，食落雞味唔算濃，小編就覺得呢個combination用嚟做煎餃應該好味好多！
煎餃（菜心豬肉餃／韭黃雞肉餃）
相對嚟講，小編就鐘意煎餃多啲，原因係佢都煎得塊皮金黃色，食落卜卜脆！
「菜心豬肉餃」係個幾少見嘅配搭，菜心都幾嫩，唔會話食落有渣，豬肉煎完反而仲香！
「韭黃雞肉餃」個餡就睇落冇咩特別，不過韭黃食落都幾香，雞肉彈牙唔錯！跟埋辣菜甫食都幾惹味！
醉豬手
一客其有五件，份量其實幾多，不過花雕酒都真係落得有啲太多！豬手本身幾爽，清潔都乾淨唔會有毛，有幾粒杞子，雖然係幾入味但係酒味太濃，真係有啲吃不消！
麻辣牛腱絲
呢個牛腱絲都係爽口彈牙嘅，不過同樣係調味有少少出事，辣醬落得過火，同埋有啲太咸，搞到邊食邊流汗，但又要搵嘢飲解下咸同埋辣！
如果可以改善返啲就比較好，整體嚟講佢哋招牌嘅餃子質素都保持到多年前嘅質素，仲係餡正足料好味嘅，不過小食就要多加改善！個用餐環境都好舒服同埋relaxing，唔好浪費咗咁好嘅配套先得架！
▌甜記餃子
📍地址：太子砵蘭街450-454號HQ大廈地下C-D號舖
⏰營業時間：早上11時30分至晚上10時
0 個留言