【香港 | 西環美食💛】西營盤人龍上海麵老店金龍排骨麵 超足料屹立三十載 招牌必食上海排骨 菜膽雲吞大粒到嚇親人？

一間舖頭成日大排長龍，都一定有啲原因（廢話！） 呢間喺西環屹立超過三十年，每逢食飯時間都勁多人排隊，到底又有咩咁吸引呢？ 講緊嘅就係呢間金祥排骨麵！

位處德輔道西電車路，附近主要都係民生舖頭為主。店舖裝修平實，而且店面唔大，十零張檯，係傳統上海麵館嘅格局。排隊時店員會畀餐牌大家睇，順手落埋單，等大家坐低就有得食，同時佢哋又可以翻多兩張檯，睇得出老闆都幾識做生意！

店名叫得排骨麵，招牌菜當然係炸排骨啦！不過聽講佢哋嘅菜膽雲吞都係必點之選，想一次過試哂叫雙拼菜膽雲吞排骨麵就啱哂！ 

菜膽雲吞排骨麵

上海嘅排骨，其實就係豬扒，所以真係唔使驚話要「梅骨」！ 排骨真係原塊上，大過塊面。表皮炸得香脆，唔係一味痴粉，所以食落一啲都唔油！ 

肉質嫩滑，調味得宜，肉汁仲幾多添！ 如果鐘意食辣，就可以加啲辣醬，會更加惹味！ 

菜膽雲吞同樣係超級大隻，剩係餡料部分都大過隻匙羹！咬開入面見到係漲卜卜嘅白菜同埋豬肉，食落都好彈牙，幾juicy！

湯底就係清湯底嚟，無落味精，配上傳統嘅上海麵，麵質無咩特別，加埋蔥花、同埋三棵切半嘅白菜仔，當正餐食到捧住肚仔絕對無難度！ 

成個麵足料味道又好，跟埋嘢飲埋單都唔使60蚊，難怪吸引到一班捧場客！ 你又有冇興趣試試先？