【香港 | 土瓜灣美食💛】土瓜灣超水準漢堡外賣店鳩砌gau1chai3 齋開晚市足料juicy夠砌夜繽紛？

前排又翻炒「港女呻Five Guys一餐$2XX不值」，想食一個好食嘅漢堡包係咪真係咁難？有冇諗過新鮮即叫即整嘅漢堡，到底可以有幾好味？ 聽講土瓜灣有一間齋開夜晚嘅外賣漢堡店，身為burger控嘅小編當然要去尋下寶啦！

講緊嘅就係呢間喺馬頭圍道嘅鳩砌啦！ 雖然只開夜晚，仲只做外賣，但係佢就好似漆黑中嘅螢火蟲咁吸晴！因為店內面塊霓虹招牌真係好突出呢！

由土瓜灣站行過去幾分鐘就到，主打煙肉同芝士漢堡，再自選唔同嘅topping同醬料！Topping可以加午餐肉、雞髀菇、洋腸、豬頸肉、焦糖化洋蔥等，醬汁就有黃芥末、泰式辣醬、千島醬，仲有兩隻鳩醬！成個feel就好似食緊漢堡界嘅subway咁，要keto嘅仲可以揀走包，不過叫漢堡走包，真心咩？

煙肉芝士漢堡 配 鳩醬

咁遠水路一場嚟到，當然要試店長推介嘅配搭啦！煙肉芝士加蛋再加鳩醬，到底鳩唔鳩呢？

等咗五分鐘個包就上手，用錫紙包住都feel到熱辣辣！麵包用牛油烘過，香得嚟寧舍好味。個漢堡超juicy，一咬落去爆汁咁滯！啲肉煎得好香，有黑椒加埋是日鳩醬係韓式辣醬，甜甜辣辣真係好惹味！

本身個包已經有生菜，芝士熱到慢慢融，夾埋煙肉彈彈哋嘅口感，特別有層次，食完真係大滿足呀！ 由於店家只做外賣，可以嘅話新鮮食就最正 如果想坐低食，最近就可以行去附近嘅巴士站開餐，佢哋開到凌晨兩點半，有車嘅朋友深夜遊車河順便食宵就啱哂，絕對值得一試！